الحلقة ديال اليوم غادي تكون تتمة للموضوع ديال "المادة المظلمة" وغادي ناقشوا اليوم "الطاقة المظلمة او Dark energy" الي كتشكل 70 في المئة او اكثر من الكون ..
وكما حدث مع "المادة المظلمة" فالحلقة لي فاتت حتى اليوم كاين الغموض .. وغادي نشوفوا اوجه التشابه بين المادة و الطاقة "المظلمة".
"الطاقة المظلمة" هي الطاقة الأكثر إنتشار وعندها جوج 2 خاصيات مشتركة مع "المادة المظلمة Dark matter" .. الخاصية الأولى هي ان تأثيرهما (الطاقة المظلمة و المادة المظلمة) كيظهر غير على المجرات .. ومكيبانش تأتير ديالها على الكواكب او الإنسان .. والخاصية الثانية هي عدم فهم مكوناتها لأنها وكما يظهر من الإسم "مظلمة" .
كيفاش عارفينا ان "الطاقة المظلمة" كاينة؟
هدشي بدأ مع إنشتاين و "النظرية النسبية العامة" لي كتهضر على تمدد الكون .. "ممكن تلقاو الشرح ديالها فويكيبيديا" هذه التمدد كتشفناه عن طريق مراقبة قياس بعد ضوء "سوبر نوفا Supernova" .. وهاد "السوبر نفا" هي انفجار نجمي قوي جداً كيدفع النجمة فيه الغلاف ديالوا في الفضاء من خلال انفجار بلازمي عند نهاية عمر النجم .. وهاد الإنفجار كيخلي تتكون سحابة كروية حول النجم .. وكتكون لامعة و براقة للغاية لأنها مكونة من البلازما .. المهم هاد "السوبر نوفات" هوما لي كيسمحولنا ندرسوا سرعة تمدد الكون .. حيت كنستعملوهم كمصابيح ثابثة ودائمة .. هاد المراقبة اكدات عكس ما كان يعتقده الفلكيون لي كانوا كيعتاقدوا ان "سرعة تمدد الكون تنخفض مع مرور الزمن" ولاكن المفاجأة كانت ان سرعة تمدد الكون تتسارع اكثر فأكثر.
هاد الإكتشافات خلات العلماء يعتابروا ان زيادة سرعة تمدد الكون راجعة إلى وجود "طاقة مظلمة" غير معروفة .. وكتسمى "بالطاقة المظلمة" لأنها ليست من اشكال الطاقة المعهودة عند البشر .. ومعمرنا شفنا شي طاقة فحال هكا.
وتمكن العلماء من رصد ظاهرة التمدد الكوني عن طريق "الإنزياح الأحمر Redshift" .. باش نوضحوا الفكرة ناخدوا مثلاً نجم من مجرة معينة وكنراقبوا الموجات الكهرومغناطيسية ديالوا إلى كان كيبعد علينا كيبان اللون ديالوا مائل للأحمر وإلى كان كيقرب منا كيبان اللون ديالوا مائلة للأزرق .. وبهذه الطريقة تمكنا من مشاهدة تمدد الكون و إكتشاف وجود مادة تأثر على الكون او تمدد الكون من حولنا.
طبعاً هدشي كامل مزال فيه خدما طويلة كتسنا علماء الفلك .. ومن جهة وحداخرا كيخلينا نزيدوا نفهموا التنوع ديال الكون من حيث الطاقة و المادة .. وهدشي كيخلينا نفهموا انه من الضروري ان نطور التكنولوجيا أكثر.
ليست هناك تعليقات:
إرسال تعليق